Leratorato | Molebatso Mogane | Subtle Stars

 

Leratorato – Molebatso Mogane

 

Age!

Ke yena Lerato,

Ngwana wa go ngwathela mang le mang lerato,

Ngwana wa pelo ya go kganya bjalo ka lesedi,

Ngwana wa maahlo a go kganya go feta dinaletsana tsa bosego,

Ngwana wa mmele wa go bopega eke letsobana,

Ngwana wa go ja kudumela tsa phatla ya gagwe,

Wa go se kitimisane le masogana.

 

Ke go botsa ka ngwana wa mopedi,

Ngwana wa go tlhompha mang le mang a kopanago leena ka ditsela,

Ngwana wa go ikgantsha ka setso sagabo,

Morwedi’a Thamaga le Mmalesele,

Ngwana wa go itlhompha,

Wa letswejana la go ema tsi!

 

Ke yena ngwanenyana fela yoo banna le masogana

Ba ka ratago go mo ntshetsa dikgomo

Le ge ekaba tse makgolo.

Asole wa sepela o ya motsaneng wa gagwe,

O gorosa ke nkgwete ya dinkgwete.

E ile kgarebjana ya go ratwa ke masogana e ile,

E hweditse lerato.